1. Hasiera

2. Edertasunaren atzean

3. Entrenatzaileak

4. Publikoa gora

Castellano 2003ko Martxoaren 23a - 1892.alea

EDERTASUNAREN ATZEAN.
Ikusteko kirol ederra da patinaje artistikoa. Patinatzaile arinek elementu zailenak inolako esfortzurik gabe egiten dituztela dirudi. Baina horren atzean izotz gainean pasatako ordu piloa dago, kolpeak, ipurdikoak... Itziar Ugarte Araba Klubeko lehendakariak horrela erantzun digu patinatzaile izateko zer behar den galdetuta: "Sakrifizioa, orduak eta orduak sartzea, izotzarekin ahalik eta kontaktu gehien izatea, sekulako prestaketa fisiko eta mentala". Marilo Aristegi Txuri-Berriko lehendakariak kirol konplexua dela berretsi du eta "garapena oso mantsoa" dela. Bere seme Jon Garciak ederki daki hori: "Hiru hilabetetan oinak gurutzatzen ikasteko ikastaroak antolatzen dituzte, eta hori utopia da. Patinaje oinarri sendo bat hartu behar da lehenik gero artistikoan (edo hockeyan) hasteko". Juan Gomez ere monitore lanetan aritzen da Txuri-Berrin eta berak esan digunez "garrantzitsua da oso txikitatik hastea". Hiru urterekin dagoeneko ikastarotan has daitezke haurrak eta 6-7 urterekin klubean sar daitezke artistikoa ikastera.

Baina bi klubetan azpimarratu digutenez, patinajearen oztopoak ez dira soilik fisikoak. Instalazioak ezin dituzte nahi dutenean erabili, izotz pistetako kudeatzaileek ustiaketa komertziala lehenesten baitute. Txuri-Berrikoek, esaterako, sarritan pista herena besterik ez dutela, entrenatu behar izaten dute. Jon Garciak kontatu digunez, "pista osorako aukera goizean goiz, gauean edo eguerdian bakarrik izan dezakegu". Aurten maila ona erakutsi duten hiruzpalau neska estatu mailako lehiaketan sartu nahi izan dituzte. 10 urte inguruan dabiltza eta gaueko 21:l5etatik 22:30etara entrenatu beharko lukete. Gurasoek ezezkoa eman diete. "Haien jarrera ulertzen dugu" dio Marilo Aristegik, "baina zoritxarrez ez dugu beste ezer eskaintzerik".

Haurren sakrifizioaz gain, gurasoen sakrifizioa ere eskatzen du kirol honek, ekonomikoa bereziki. Arabako Itziar Ugartek esan digu konpetiziorako oinarrizko jantzi batek 150 euro inguru kostatzen duela eta horren gaineko dekorazioa 100-150 euro baino merkeago lortzea oso zaila dela. Nahi izanez gero erraz gastatu daitezke 600 euro jantzi batean. "Nik behin nire alabarentzako jantzi batean 4.000 lentejuela josi nituen banan-bana" dio Itziarrek eta berehala zera galdetu dio bere buruari: "Horrenbeste lan egiteak merezi al du?". Izan ere, botak ere oso garestiak dira. Erdi-goi mailako kutxilak 500 euro ingurutan daude salgai eta bota eta guzti, zaila da 600 eurotatik jaistea. "Gainera haurrak hazi egiten dira eta denbora gutxian botek ez diete balio". Horri guztiari klubak pistaren erabilera ordain dezan gurasoek eman beharreko kuotak daude eta patinatzaile guztiak federatuak egotera derrigortuak daude gainera, horregatik ere ordainduz. Kuotak, materiala, bidaiak, dietak.

NAGORE IRAZUSTABARRENA